سه‌رۆکی په‌رله‌مان و وه‌فدی یاوه‌ری ئاماده‌ی به‌شێکى کۆبوونه‌وه‌ى په‌رله‌مانى به‌ریتانیا بوون

دوێنێ ‌15/3/2010  د. که‌مال که‌رکوکى  سه‌رۆکى په‌رله‌مانى کوردستان له‌شوێنى حه‌وانه‌وه‌ى خۆى  لە لەندەن چاوى که‌وت به‌ جێرمى ماکادى  کونسلى گشتى به‌ریتانیا له‌هه‌ولێر و نورا دوگانى به‌رپرسى په‌یوه‌ندییه‌ گشتیه‌کانى  له‌کاروبارى ده‌ره‌وه‌‌ و کۆمۆنویلس .

 له‌ دیدارێکدا که‌ به‌ئاماده‌بوونى ئه‌ندامانى وه‌فدى په‌رله‌مان‌و نوێنه‌رى حکومه‌تى هه‌رێم له‌به‌ریتانیا به‌رێوه‌چوو، کونسلى گشتى به‌ریتانیا وێراى به‌خێرهێنانى گه‌رمى شانده‌که‌ و  ده‌ربرێنى خۆاشحالى خۆى به‌سه‌ردانى وه‌فده‌که‌ هیواى خواست ئه‌م جۆره‌ سه‌ردانانه‌ به‌رده‌وام بن بۆ گه‌شه‌پێدانى زیاترى په‌یوه‌ندیه‌کانى نیوان هه‌ردوولا ‌و  گۆرینه‌وه‌ى ئه‌زمون به‌یه‌کتر. دواتر سه‌رۆکى په‌رله‌مانى کوردستان سوپاسى حکومه‌ت‌و په‌رله‌مانى به‌ریتانیای کرد بۆ ئه‌و میوانداری و پێشوازیه‌‌و ئاماژه‌ى به‌گرنگى پته‌وکردنى په‌یوه‌ندیه‌کانى نیوان به‌ریتانیا‌و هه‌رێمى کوردستان کرد له‌گشت بواره‌کاندا.

سه‌عات 11:30 پێش نیوه‌رۆى  هه‌مان رۆژیش وه‌فدى په‌رله‌مانى کوردستان  به‌یاوه‌رى کونسلى گشتى به‌ریتانیا سه‌ردانى ته‌لارى په‌رله‌مانى به‌ریتانیایان کرد‌و له‌لایه‌ن خاتوو ساره‌ پۆلڤره‌مان پێشوازى کرا که‌ئه‌رکى نیشاندان و شیکردنه‌وه‌ى میژوو ‌و رۆل‌و پێکهاته‌ى  په‌رله‌مانى به‌ریتانیایه‌ و ناوبراو به‌مه‌به‌ستى  ئاشنابوونى وه‌فده‌که‌ به‌ شیوازى کارى په‌رله‌مانى  به‌ریتانیا ئاماژه‌ى به‌گرنگى رۆلى سه‌رۆکى فراکسیۆنه‌کان کرد که‌به‌ ویپه‌کان  ناسراون  و ئه‌رکیان چه‌سپاندنى دیسپلینه‌کانى نێو پارته‌کانه‌ له‌په‌رله‌ماندا.  

سه‌عات  2:30  پاش نیوه‌رۆى هه‌مان رۆژ  سه‌رۆکى په‌رله‌مانى کوردستان  وشاندى  یاوه‌رى   ئاماده‌ی به‌شێکى  کۆبوونه‌وه‌ى په‌رله‌مانى به‌ریتانیا بوون که‌ ده‌رباره‌ى کێشه‌ى بێکارى ‌و  دۆزینه‌وه‌ى ده‌رفه‌تى  کارو ‌و چۆنیه‌تى هه‌موارکردنى یاساکانى ئه‌و بواره‌ به‌رێوه‌ده‌چوو که‌ تیایدا ئه‌ندامانى ئۆپۆزسیۆن‌و زۆرینه‌ى په‌رله‌مان گفتوگۆیه‌کى جدى ‌و راشکاوانه‌یان ده‌رباره‌ى  کێشه‌ى بیکارى  ده‌کرد‌و ره‌خنه‌‌و بۆچوونه‌کانیان بابه‌تیانه‌ ده‌خسته‌ روو.

دواتریش  شاندى په‌رله‌مانى کوردستان له‌ به‌سه‌رکردنه‌وه‌‌و گفتوگۆکانى له‌نێو په‌رله‌مانى به‌ریتانیا به‌هه‌ردوو به‌شى ئه‌نجومه‌نى لۆردان‌و ئه‌نجومه‌نى نوێنه‌ران  درێژه‌ى کێشا. بریاریشه‌ سه‌عات  7  ئیواره‌ى ئه‌مرۆ دووشه‌ممه‌ وه‌فدى په‌رله‌مانى کوردستان  ئاماده‌ى  ئاهه‌نگى نه‌ورۆز بکات که‌  له‌لایه‌ن  جالیه‌ى کوردى له‌ له‌نده‌ن رێکده‌خرێت.

	ئه‌م بابه‌ته‌ پرینت بکه‌‌‌
	ئه‌م بابه‌ته‌‌‌ بکه‌ به‌ فاڤوریت
	بگه‌ڕێوه‌